Hollar brownies

Það vita þeir sem þekkja mig að ég elska súkkulaði, hverju nafni sem það nefnist. Ég er búin að láta mig dreyma um súkkulaðiköku núna í nokkrar vikur en einhvernveginn hef ég ekki haft tíma til að skella í eina slíka á síðustu nammidögum. Elsku mamma gerði sér hins vegar lítið fyrir í dag og vippaði fram úr erminni einni skúffu. Nammidagurinn minn var í gær svo það var ekki í boði fyrir mig að úða í mig þessum kræsingum. Ég tók því til minna ráða og bjó til þessar brownies hér: https://www.pinterest.com/pin/404479610260011066/  

Enginn viðbættur sykur, ekkert hveiti og ekkert smjör. Þetta hljómar nú auðvitað of hollt til að vera gott, er það ekki? En ég varð sko ekki fyrir vonbrigðum! Þvílík endemis snilld. Hollusta þarf sko síður en svo að vera þurr eða leiðileg!

Ég var of spennt að gúffa til að taka fallegar myndir svo þið takið þessum myndum með miklum fyrirvara. 

Ég umbreytti bollamælingum í dl, einfaldlega vegna þess að ég á ekki mælibolla. Í stað grískrar jógúrt notaði ég hreint skyr og ég notaði Erythriol sem sætu.

Hollar brownies

1,8 dl hreint skyr

0,6 dl Fjörmjólk

1,2 dl Kakó

1,2 dl Haframjöl

1,2 dl Erythriol

1 egg

0,8 dl Epla og perumauk 

1 tsk lyftiduft

smá salt

Aðferðin er sú allra einfaldasta. Þessi er öllu blandað saman (ég notaði blandara) og svo hellt í bökunarform (fínt að spreyja aðeins olíu í formið). Formið er svo sett inn í 200° heitan ofn í u.þ.b. 15 mín. 

Ég hvet ykkur eindregið til að prófa!

Baunachili með súkkulaði og heimalagað nachos

Ég held áfram að prófa mig áfram með grænmetisrétti en stefnan er sett á að hafa a.m.k. einn grænmetisrétt á viku. Í gær gerði ég einn alveg ofsalega góðan sem ég bara verð að mæla með! Uppskriftina fékk ég senda frá Pésa vini mínum, en við höfum svipað mikinn áhuga á matseld og hjá honum er um auðugan uppskriftargarð að gresja!

Hérna er upphaflega uppskriftin: http://www.koket.se/bonchili-med-choklad-avokado-och-graddig-majs . Ég gerði svo smávægilegar breytingar og úr varð þessi dýrindis réttur. Ekki er erfitt að nálgast innihaldsefnin og það er afskaplega einfalt og fljótgert að útbúa þetta. Til að toppa þetta allt saman fer þetta líka vel með budduna þar sem innihaldsefnin eru tiltölulega ódýr. Þennan rétt mun ég sko klárlega gera aftur!

Baunachili með súkkulaði (Fyrir u.þ.b. 4-5)

Innihald:

1 dós svartar baunir

1 dós kjúklingabaunir

1 dós nýrnabaunir

1 laukur

3 hvítlauksgeirar

2-3 sellerístilkar

2 rauð chili (ég fræhreinsaði enda með einn sem verður alltaf eins og eldspúandi dreki ef hann bragðar á einhverju sem er eitthvað í ætt við sterkt, ég hefði hins vegar ekki gert það annars)

3 gulrætur

1 rauð paprika

3 sveppir

1 dós hakkaðir tómatar (basil, oregano)

1 dós af vatni

2 línur af 70% súkkulaði 

1 msk cummin (EKKI kúmen)

1 msk soja sósa

1/2 lime

salt og pipar

olía til steikingar

kóríander til að dreifa yfir

Aðferð:

Byrjið á því að skola baunirnar. Takið svo fram stóran pott, skvettið smá olíu, saxið laukinn, hvítlaukinn, selleríið, chilliið, gulræturnar, paprikuna og sveppina smátt og setjið það ásamt cummin í pottinn og steikið í smá stund (5 mínútur ca). Hrærið baunum því næst saman við í um 2 mín. Þá fara tómatarnir, vatnið, lime-ið og sojasósan út í pottinn, suðan látin koma upp, hitinn lækkaður og látið sjóða í um 30 mín. Að lokum er súkkulaðið saxað smátt og því bætt út í pottinn (ég rak upp stór augu þegar ég sá þetta innihaldsefni en þetta er sko algjör galdur!). Smakkið til með salti og pipar. Ég setti svo bara kóríander á borðið og hver og einn stráði yfir diskinn sinn eftir smekk. 

Með þessu bar ég fram salat með hnetum, maísinn (eftir uppsskrifinni sem gefin er sænska linknum hérna að ofan) og heimatilbúið nachos. Að útbúa nachosið er leikur einn, tekur enga stund og verður að teljast mun skárri kostur en að kaupa doritos eða annað nachos ef litið er til hollustu. Hollustan kemur ekkert niður á bragðinu get ég sagt ykkur :)

Heimatilbúið nachos

Innihald:

Heilhveiti tortilla kökur

isio4 olía

gróft sjávarsalt

paprikukrydd

Aðferð:

Htið ofninn í 250°. Skerið tortilla kökurnar í hæfilega stórar ræmur (fínt að nota pizzaskera), dreifið jafnt á ofnplötu, penslið með olíu (ég geri bara öðru megin), dreifið salti og paprikukryddi yfir og setjið inn í ofninn. Það þarf að fylgjast nokkuð vel með þessu því þegar kökurnar fara að brúnast þá gerist það mjög hratt. Þetta tekur enga stund, ég fylgdist ekki náið með tímanum en ætli þetta hafi ekki verið um 5-8 mínútur. Ég var með tvær ofnplötur svo eftir smá stund þá skipti ég á efri og neðri. Þegar kökurnar eru farnar að gyllast og harðna eru þær tilbúnar.. voilá!




Ég vona svo sannarlega að þið prófið þessa uppskrift, þið verðið ekki svikin!

Heilbrigður lífsstíll

Mér líður ofsalega vel þessa dagana. Ég hef sjaldan eða aldrei verið jafn dugleg að æfa. Mér finnst gaman og ofsalega gott að borða hollt, pæla í næringu og hugsa hvað ég get gert betur. Í fyrsta sinn á ævinni er fókusinn líka algjörlega 100% á því hvað ég get gert til að vera sem heilbrigðust, til þess að líkami minn sé sterkur, rétt nærður og öll líkamsstarfsemi sé í lagi. Þetta snýst ekki um að líta vel út í bikiníi eða reyna að losna við appelsínuhúð hér eða þar. Þetta snýst einungis um það að reyna að gera mitt til að tryggja að ég lifi löngu og hamingjusömu lífi með öllum þeim sem mér þykir vænt um. Það hvað ég læt ofan í mig og hvernig ég þjálfa líkamann er nefninlega algerlega í mínum höndum. 

Bananamúffur

Þessi laugardagur er búinn að vera einkar ljúfur. Litla ljósið okkar byrjaði í jazzballet og fyrsti tíminn stóð heldur betur undir væntingum. Hún er í hóp með vinkonu sinni af leikskólanum og það gerir upplifunina auðvitað ennþá skemmtilegri. Mér leið eins og hún hefði elst um þó nokkuð mörg ár þar sem hópurinn hennar samanstóð af 4-6 ára stúlkum og mömmur og pabbar biðu bara fyrir utan á meðan. Ég reyndi að gægjast inn um gluggann en það bar takmarkaðan árangur þar sem hún mátti helst ekki koma auga á mig með nefið á rúðunni..

Áður en við lögðum af stað í morgun spurði Emilía hvort við gætum bakað bananamúffur. Henni finnst ofsalega gaman að dandalast með mér í eldhúsinu og mér finnst það svo jákvætt og vil endilega ýta undir það. Hún er einkar flinkur hjálparkokkur og afurðin verður alltaf mun girnilegri í litlum augum ef hún veit að hún á sinn þátt í henni.  :)

Við höfum margoft gert bananamúffur áður en þessi skammtur kom einkar vel út og langaði mig að deila uppskriftinni hérna. Ekki síst fyrir mig þar sem ég á það til að vera aðeins of fljót að gleyma.

Innihald:

- 3 bananar (því þroskaðari því betri)

- 2 egg

- 5 stevia dropar (ég notaði Better stevia liquid sweetener, dark chocolate frá NOW)

- 50 ml olía (ég notaði isio4)

- 250 g hafrar

- 1,5 tsk vínsteinslyftiduft

- 1/4 tsk salt

- 2 tappar vanilludropar

- 70% súkkulaði (eða t.d. döðlur) smátt saxað - magn eftir smekk en ég mæli með 50-75 g

Aðferð:

Byrjið á því að stappa bananana, mér finnst gott að hafa þá gróflega stappaða svo maður finni fyrir smá bananabitum í kökunum, en það er auðvitað smekksatriði. Sullið svo restinni allri saman við, það gerist varla einfaldara. Því næst er deiginu skipt á milli muffinsforma (svona u.þ.b. 2 kúfaðar teskeiðar) og þau sett í ofn í u.þ.b. 20 mín á 200 gráður. Úr þessari uppskrift komu 22 múffur.

Múffurnar eru ofsalega góðar þegar þær eru ný komnar út úr ofninum. Þar sem þetta er svolítið stór uppskrift stefni ég að því að geyma það sem ekki verður borðað bara inn í frysti og hita þær upp í örranum þegar á þarf að halda. Það er sko ekki verra að eiga svona gotterí til á lager :)  

Grænmetislasagna

Jæja, þá er nýtt ár gengið í garð og ég held ég hafi sjaldnast orðið svona mikið vör við janúar átök fólks allt um kring! Sjálf hef ég aldrei komið betur undan jólunum. Ég borðaði að ég held tvo Mackintosh mola og óvenju lítið af Nóa konfekti. Ekki að það hafi verið meðvituð ákvörðun, það bara æxlaðist svoleiðis og ég var bara nánast laus við sætindaþörfina, í fyrsta sinn á ævinni. Ég stökk bara um borð í þá lest og er að vona að ég nái að halda mig um borð sem allra lengst.

Eftir hátíðarnar er mig bara búið að langa í ferskan mat, fisk og grænmetisrétti. Ég er viss um að margir hugsa það sama. Í gær eldaði ég grænmetislasagna sem kom afskaplega vel út og mig langaði að deila gleðinni með ykkur. Einfaldara gerist það varla og svo er auðvitað hægt að leika sér með innihaldsefnin út í hið óendanlega. Ég bar lasagnað fram með bankabyggi (ég setti smávegis af ferskri steinselju út í þegar byggið var tilbúið, en það finnst mér stórgott) og brauði.

Innihald:

matarolía

2-4 hvítlauskrif

hálfur chili (ég notaði grænan en hefði allt eins getað notað rauðan)

1 rauðlaukur

1 askja sveppir

1 kúrbítur

6 gulrætur (þær voru óvenju smáar)

u.þ.b. hálfur poki spínat

1 dós diced tomatoes (ég kaupi alltaf með basil, oregano og garlic)

1 dós tómatpúrra (þessar í stærri dósunum)

u.þ.b. 2 tsk oregano

u.þ.b. 2 tsk basil

vatn (u.þ.b. 2-3 bollar)

salt og pipar

1 stór dós kotasæla

1 dós grænt pestó

grænar ólívur

rifinn ostur

lasagnaplötur

Aðferð:

Byrjið á því að merja hvítlauksrifin og skera chili, sveppi, kúrbít, rauðlauk og gulrætur.Setjið smávegis af olíu á pönnu og hendið grænmetinu á. Hendið spínatinu líka með. Kryddi grænmetið með oregano, basil, salti og pipar og steikið létt.

Allt er vænt sem vel er grænt

Bætið tómötunum, púrrunni og vatninu við og látið sjóða í u.þ.b. hálftíma. 

Smyrjið eldfast mót og byrjið á því að setja grænmetisblönduna (1/3 af blöndunni) í botninn. Næst setjið þið lasagnaplöturnar yfir grænmetið og þar ofan á setjið þið kotasælu (1/2 af dósinni), pestó (1/2 af dósinni) og niðurskornar ólífur. Þá byrjar ballið aftur og grænetmissósan, lasagnað og kotasælupestóólívulagið er sett til skiptis. 

Efst er semsagt grænmetissósa og þar ofan á setjið þið rifinn ost. Það eru þá þrjú lög af grænmetissósu, tvö af lasagnaplötum og tvö af kotasælupestóólívulagi.

Þessu er svo skellt inn í ofn í u.þ.b. 40 mín á 180°. Byggið þarf sama suðutíma svo það passar vel að setja byggið af stað rétt áður en þið farið að setja lasagnað saman. 

Þetta er alveg klárlega eitthvað sem ég mun gera aftur og aftur.. og aftur.

Ég vona að þið njótið vel!

HÆ!

Það er einhvernveginn þannig að því meira af skemmtilegum hlutum sem ég geri, því minna blogga ég. Svei mér þá. En ég segi það og skrifa að ég ætla að koma með Búdapest blogg, Washington blogg og Ljubljana blogg áður en langt um líður. Nú er ég nefninlega á fullu í ritgerðarskrifum sjáiði til. Þá er alltaf sniðugt að finna sér eitthvað annað að bjástra við... ehmm já.

Talandi um ritgerðina. Ég er komin núna vel á veg með að dúndra niður efni. Ég er svolítið að tækla þetta bara þannig að ég reyni að bauna útúr mér öllu því sem mig langar að koma að. Fagurfræði, formfræði og setningarfræði fá að bíða betri tíma. Mér finnst ritgerðarvinna bara ofsalega skemmtileg. Ég er að vísu alveg að fara að verða búin að geta frestað þessum leiðilega erfiðu köflum en þó þeir séu ef til vill strembnastir þá er svo gaman að lesa og fræðast um ritgerðarefnið að ég bara ætla ekkert að vorkenna mér neitt yfir því. Ég er nokkuð viss um það að ég hafi fundið mitt áhugasvið loksins. Alþjóðalögfræði er eitthvað sem heillar mig gífurlega og mikið sem ég vonast til að geta unnið við það í framtíðinni. Verst hvað Ísland er mikill útjaðar þegar kemur að þessu. Við sjáum til.

Það styttist heldur betur í flutningana. Við losum íbúðina í lok júlí og það er allt í einu bara kominn miður júní svo það er nóg að gera á skipinu. Akkúrat þessa stundina er allt upp í loft og heimilið okkar eins og lager þar sem við erum að sortera í geyma, selja, gefa, henda hrúgur hér og hvar. Þetta gæti verið fullt starf fyrir tvær manneskjur í tvo mánuði að fara yfir þetta blessaða dót sem við höfum sankað að okkur sl. 5 ár. En mikið sem ég hlakka til að vera búin að fara í gegnum þetta og einfalda okkur lífið. Það er þegar farið að láta á sjá. Blenderinn okkar fékk sér nýtt heimili svo að nú verður ekki meiri booztgerð á Eggertsgötunni. Þá eignaðist kerran okkar framhaldslíf áðan. Rétt í tæka tíð fyrir 17. júní... kannski ekki smartasta trixið í bókinni en sonneritta.

Jæja, nú er vinnudagurinn víst búinn í bili. Ég þarf að fara að sækja skottið mitt litla sem er reyndar ekkert svo lítil lengur. Hún er sko að verða ÞRIGGJA ára um helgina og stefnir allt í þriggja daga veisluhöld. Það er nú eiginlega bara nauðsyn svona úr því þetta er síðasta afmælið á Íslandinu í bili. Oboy..

Besta ákvörðun sem ég hef tekið

Jæja, þá er komið að þessu.

Ég er stödd í Washington (og búin að vera hér síðan á fimmtudag) og fyrsta keppnin mín er í kvöld kl 19. 

Í gær opnunarseremónían og ég á eiginlega engin orð.. Hér eru yfir 600 laganemar hvaðanæva að úr heiminum. Við erum að tala um Afghanistan, Albaníu, Argentinu, Armeníu, Austurríki, Ástralíu, Bahamas, Bahrain, Hvíta Rússland, Belgíu, Brasilíu, Bulgaríu, Kambodíu, Kanada, Chile, Kína, Taipai, Kolumbíu, Costa Rica, Kýpur, Tékkland, Dóminíska lýðveldið, Eþíópía, Finnland, Frakkland, Gambia, Georgíu, Þýskaland, Grikkland, Guatemala, Hong Kong, Ungverjaland, Indland, Indonesía, Írland, Íran, Ítalía, Ísrael, Jamaica, Japan, Kazakhstan, Kenýa, Kosovo, Kuwait, Lettland, Litháen, Luxembourg, Macau, Malasía, Mexico, Nepal, Holland, Nýja Sjáland, Nígería, Pakistan, Palestína, Panama, Perú, Filippseyjar, Pólland, Portugal, Puerto Rico, Portúgal, Rúmenía, Rússland, Serbía, Singapore, Slóvakía, Slóvenía, Suður-Afríka, Suður-Kórea, Spánn, Sri Lanka, Svíþjóð, Sviss, Tanzania, Tailand, Trinidad og Tobago, Tyrkland, Úganda, Úkraína, Sameinuðu Arabísku Furstadæmin, Bretland, USA, Uzbekistan, Venezuela, Víetnam og svo Ísland.

Eins og sjá má er þetta alveg ótrúlega fjölbreytt og skemmtilegt, frá nokkrum löndum eru líka margir skólar. Öll liðin voru kölluð upp í gær og gengu með fánann sinn í gegnum salinn og öllum var fagnað. Fagnaðarlætin voru hvað mest þegar Úkraína var kölluð upp (en málið snýst að hluta til um Krímskagann), Palestína fékk líka heilmikil fagnaðarlæti, Kuwait, Kosavo og Kenya líka. Ísland fékk líka extra klapp. Þetta var ÆÐISLEGT! Gæsahúðin er svona rétt að rjátlast af mér. 

Mér finnst þetta svo magnað fyrirbæri. Hér er fólk frá allskonar menningarheimum sem lifir ólíku lífi og býr við mjög mismunandi kjör. Eitt eigum við þó öll sameiginlegt og það er Jessup. Við erum öll að flytja sama málið og búin að vera að pæla í sömu hlutunum. Mér finnst ég óendanlega heppin að fá þetta tækifæri til að kynnast þessu fólki og ég ætla mér að nýta það sem best. Keppnin er ekki hafin en við höfum þó haft tækifæri til að spjalla við þónokkuð af fólki héðan og þaðan. Það er nokkuð ljóst að það að taka þátt í Jessup er það viturlegasta sem ég hef gert síðastliðin tæpu 26 ár. 

Dagurinn í dag mun fara í að stúdera ræðuna mína enn betur og hlakka til kvöldsins.